ليش مش ميندي ؟ 

الصيف الي فات لما كنت في القاهرة، كنت في مكتبة و لقيت كتاب ميندي كالنق Why Not Me و طبعا “ترفعت” عليه، مع اني وقتها كنت حاضرة اول جزئين من مسلسل The Mindy Project بس شفته و قلت خلي نشري حاجة “مفيدة” و “كلاسيكية” اكثر، من جدي نشري كتاب وحدة متاع كوميدي؟ شن حتعلمني يعني؟ 

طبعا ماتخلونيش نبدا نحكي كيف ندمت على ترفعي الغبي هذكي. المهم عمرك ماتحكم على كتاب هكي وخلاص ( إلا إذا كان مذكرات باريس هيلتون ولا حليمة بولند في الحالة هذي، ارجوك احكم كيف ماتبي) المهم في شهر أربعة الي فات قررت انا و خديجة نقروا كتابها Why Not Me مع بعضنا، تغيير جو هكي يعني. 

من أحسن القرارات  الي عمري اتخذتهن، يس انا قلت حاجة هكي بس توا حنقوللكم ليش، مش لأنه كتاب وجودي أو حيغير تفكيرك أو أو أو، هو عبارة عن سلسلة مقالات، قصص و اراء هي مرت بيهن في حياتها مش عشوائي بس كل قصة في نهايتها خلاصة فيها جو و يضحكن بكل. 

 تركيبة الكتاب عبارة عن اول جزء شويا نصائح جمالية، بعدها تحكي على تجربتها في الجامعة، و صاحباتها وقتها بعدها ثلاث الاجزاء الاخرى تحكي فيهن قصص اكثر على شغلها في The Office و كيف دارت The Mindy Project و حياتها كله طبعا بطريقة مضحكة لأبعد الحدود، رسمي مش حتوقفوا ضحك. 

 بعد تقري الكتاب، اول حاجة حتلقي روحك مريتي بقصتين من قصصها على أقل تقدير. 
ثاني حاجة حتكتشفي في ميندي قدوة، لأنها شخصية ذكية جدا و فريدة جدا و مضحكة جدا ( لدرجة عاودت قريت الكتاب اخرى توا عشان نكتب البوست هذا ) جديات شخصية ملهمة. 

” A lot of people ask how to get to where I am, and the single biggest thing, which is not profound, is that I work like a dog. And I work seven days a week. I have done that since forever. I can’t stress that enough.” 


“في ناس واجد يسألوا فيا كيف يوصلوا لوين ماوصلت توا، لكن اكثر حاجة مش فاهمينها إني نشتغل سبع ايام في الأسبوع، و نشتغل بطريقة هذي من العهد القرمانلي. ماظنيش نعاود فيها الجملة هذي بعدد كافي” 

مافيش حاجة تجي هكي و خلاص، تبي تقعدي حاجة في الحياة هذي لازم تتعبي، تشتغلي، و تفكري بطريقة اخرى. ميندي في كتابها الأول Is everyone hanging out without me ? and other concerns تحكي على كيف ماحصلتش شغل، في أي مكان، اولا لأنها مرأة، ثانية أقلية ( سمرا، سمينة، هندية و في مجال الكوميديا ) صعب جدًا انها تلقى شغل فقررت تكتب دور لروحها؛  هي و صاحبتها كتبن مسرحية اسمها Matt and Ben و منها كانت البداية لمسيرتها في الكوميدي و هوليوود. يعني هي بعد مالقتش روحها في المحيط متاعها، دارت لروحها مكان. 

” It’s not that I think I’m so great. I just don’t hate myself. I do idiotic things all the time and I say crazy stuff I regret, but I don’t let everything traumatize me. And the scary thing I have noticed is that some people really feel uncomfortable around women who don’t hate themselves. So that’s why you need to be a little bit brave.

” انا مانحسش في روحي وحدة خيال. لكن مانكرهش روحي. مرات ندير في حاجات غبية و نقول في حاجات مجنونة نندم عليهن، بس مش معناها نعذب روحي على كل حاجة تصير. و الحاجة المخيفة الي لاحظتها، أن في بعض الناس مايتريحوش بعد يلقوا وحدة واثقة من روحها. فهذا ليش مفروض تقعدي شجاعة أكثر”   

من أكثر الحاجات الي نحبهن في ميندي انها مش مخلية صورة العارضة المثالية تأثر فيها. هي متقبلة روحها و شكلها بالعكس أكثر حاجة تقول فيها كيف أنها حتزعل لوّ حد قاللها انتِ غبية ولا ماتضحكيش مش لوّ قاللها انتِ سمينة ولا شينة، فالمفروض نفكروا في اولوياتنا شنو. ديما خلي عندك ثقة في روحك، الثقة ماتجيش بسهولة لكن تبي شويا شجاعة بس. 

“ Why the f*ck not me?’ should be your motto.” 

” شن معنى مش انتِ يعني؟ مفروض تقعد شعارك في الحياة “
عمرك ما تقللي من قيمة روحك، واي نوت يو؟ 

تعبت عشان نختار هذينا بس، مانبيش نطول في الدوة. فحنخليكم مع احسن نصيحة عندي هي إلي تقولها في نهاية الكتاب : 

” Work hard, know your shit, show your shit, and then feel entitled. Listen to no one except the two smartest and kindest adults you know, and that doesn’t always mean your parents. If you do that, you’ll be fine.”

” اشتغلي بضمير، افهمي شغلك، وري شغلك، وحسي أنك تستحقي الشغل هذا. ماتسمعش لحد غير اذكى و اطيب اثنين كبار تعرفهم، مش لازم يكونوا امك و باتك. لوّ درت هكي حتلقي روحك ماشية كويس بكل”

  ميندي شخصية صريحة، تضحك و طول  الكتاب تحسيها صاحبتك، انا الكتاب ننصح بيه آي وحدة شايفة المسلسل و تبي تعرف عليها اكثر أو وحدة كيف سمعت بيها من البوست هذا، بس جديات شخصية تستحق أنكن تسمعنها، ريلي ليش مش ميندي ؟ 

بس يا خسارة الكتب نفس هذي مايترجموش فيهن…  

J.E 
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s