في وحدة كيف شيكسبير ؟


من أكثر الحجج استخداما من قبل “كارهين النساء” هي أن المرأة على مدى التاريخ مش مبدعة نفس الرجل، نفس الي يجي يقولك في وحدة كيف شيكسبير ؟

تخيلوا معايا لوّ ردينا للقرن السادس عشر، وقلنا شيكسبير عنده اخت توأم، واخته هذي كان عندها نفس موهبة خوها الفريدة من نوعها بالضبط، في وقت هو تعلم كيف يكتب، هي تلقى أمها و باتها يضربوها عشان حاولت ادير حاجة اخرى غير انها تضم او تنظف، بعد ماشيكسبير كبر شويا و قرر يكملها سنكحة قدام المسارح و مرة يمثل و مرة يشتغل و مرة يقندل على صاحبه على غداء أو عشاء، أخته التوأم قاعدة حاصلة في المطبخ مش مسموح لها تتعلم او تعبر عن أفكارها المساوية في القيمة لأفكار خوها، بعد ما قعدوا يمثلوا في مسرحياته، اخته المسكينة إنتحرت بعد ما تم قمع موهبتها بس لأنها مرأة مش رجل وأكيدة التاريخ ياما فيه من مثيلات “توأم شيكسبير”.

المثال هذا استخدماته ڤيرجينيا وولف بعد ما اجتمعت مع قسيس كان تسعفني الذاكرة ( الكتاب قاريته من زمان مرات نقعد مبدلة في شوية تفاصيل ) المهم و ذكرلها لقطة قلة الابداع عند النساء هذي، طبعا انا بروحي كم مرة نخش في نفس النقاش هذا، و وولف أبدعت في الرد كيف ما أبدعت في كتابها “غرفة تخص المرء وحده”

الكتاب هو عبارة عن سلسلة محاضرات القتها ڤيرجينيا وولف فيالجامعة. طُلب منها تلقي مجموعة محاضرات على دور النساء في الادب،كولّكشن مقالات اكثر من كونه كتاب، قصير و ثوري و مهم لأي مرأة انهاتقراه.

نظريتها في الكتاب تقول أن النساء عشان توفرلهن الحرية الفكرية للإبداع لازم اولًا يحققن الاستقلال المادي عن الرجال لأن لِقرون مشّوهن كيف ما يبوا عشان هو يدفع في مصاريفها و ما عمره ماحد حيكون حر بعد يقعد شخص اخر متكفل بيه بالطريقة هذي، بالذات إذا كان المتكلف هذا متعصب و قمعي و يشوف فيكي كأنك حاجة أقل منه.

ثانيًا يكون عندها غرفة خاصة لها تقدر تعتكف فيها وتبدع. مقالاتها يناقشن في أثر القمع هذا في العصور القديمة و اسبابه. بعدها تاخذك في رحلة لتاريخ النساء و مسيرتهن عبر القرون في الشعر و الادب. اجمل نقطة عجبتني فيها فرضيتها أن المتعصبين يشوفوا في المرأة نفسالمرايا، كل ما هي تقعد إنسان منفصل و مستقل و تقدر تعيش بدونه كل ما يصغر إنعكاسه فيها لعند يتحطم. كيف؟ هذي تجيبنا للإقتباس الجاي:

“المرايا في المجتمعات المتحضرة ضروريات لأي عنف أو عمل بطولي. نابليون وموسيليني هم الاثنين يأكدوا على دونية المراة، لانهن لو ماكاننش هكي، قوتهم مش حتستمر. وهذا يوضح جزئيا ضرورة النساء للرجال. ويوضح كيف انهم مايتريحوش بانتقاداتها. وتوقعوا لو قالت انالكتاب هذا سيء او الصورة هذه ما تصلحش او اي انتقاد اخر مش حيكون كيف اي انتقاد من اي راجل آخر. لانها لو بدأت تقول الحق، الصورة اللي في المرايا حتصغر، ورغبته في الحياة تنقص. كيف يقدر يعطي أحكام ويثقف الناس ويصنع القوانين ويكتب الكتب ويخطب قدا مالناس لو ماقعدش يشوف في روحه في الفطور وفي الغداء و العشاء انه اكبر واعظم و دبل حجمه الحقيقي؟ الصورة اللي يبنوا فيها لارواحهم في المرايا مهمة جدا لانها هي اللي تقوي في همتهم و تحفز جهازهمالعصبي و تخليه هكي يشوف روحه عظيم. لو خديت منه مرايته المكبرة ممكن المتعصب هذا يموت، كيفه كيف المدمن لما تاخد منه الكوكايين.”

السبب وراء تأخر المرأة هكي هو المجتمع والبيئة. مش لأنها أقل ذكاء او إبداع أو هو أكثر منها إنسانية. يعني لما يكون الراجل هو اللي يحصل التعليم وفرص الشغل اكثر من النساء، وماحد يفرض عليه قالب معين أو دور معين يعيش فيه اكيد حيتفوق عليهن من ناحية الإبداع و القيادة و كل حاجة اخرى تجي تبعًا . لكن توا مفروض خلاص المعتقدات هذي نعزقوهن ورانا صح ؟ شن رأيكم ؟

Photo By : R.J. Poole

Advertisements

One comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s