ملخص ورشة عمل عن المرأة و بناء السلام 



”الدرع البشري“ . لفنان الروسي سيرغي سولومكو. النوع : رمزي. الأسلوب : فن حديث ” art nouveau ”



اليوم في مدينة بنغازي، حضرت ورشة عمل لمركز مضمار للإبداع و التدريب، ورشة العمل كانت حول العنف و دور المرأة في بناء السلام. ورشة العمل كانت جيدة جدا و مفيدة على اصعدة واجدة، طبعا لأني مؤمنة بمبدأ “Pay It Forward” قررت نشارك باللي تعلمته من الورشة في التدوين البسيط هذا : 
تعريف العنف : عبارة عن فعل تمارسه انت او المجتمع او يمارسه عليك حد، ممكن يكون العنف جسدي او معنوي. مثلا تمشي في شارع يجي حد يتحرش بيك، هذا عنف، تعدي لمقهى يقولولك ماتقدريش تقعدي هنا انتِ بنت، برضو عنف. 
ممكن يكون حتى عنف تمارسيه انتِ على نفسك مثلا تقولي انا غبية مانقدرش ندير الحاجة هذي او انا شكلي شين او او .. يعني أمثلة واجد.
كيف نحاربوا العنف هذا؟ اول حاجة عن طريق تبني مبدأ اللا عنف، كيف هذي؟ 
• اول حاجة الاقتناع التام بأن العنف يولد عنف. 
• الإلتزام بتبني مبدأ اللا عنف، سواءً مع نفسك او المجتمع، يعني تخلي الحاجة هذي في سلوكك مش بس إيمان عن بعد.
• الإيمان الحقيقي بالمبدأ هذا مش بس تقول أني مقتنع باللا عنف بعدها تجي لطفل صغير يبكي تقوله “ماتبكيش انت بنية؟!” هذا عنف على فكرة. 
• دافع عن حقك بعد ما حد يمارس اي عنف عليك، حاول تفهمه أني مش حنسمحلك تنتهك حقوقي و تظلمني. 
مبدأ اللاعنف يشمل : احترام الخصم، المساواة بين كل الأطراف، محاولة استقطاب حتى اصحاب الفكر المتطرف عن طريق اللاعنف، و الإيمان بأن اي انسان ممكن يتغير، كذلك عدم احتكار الحقيقة او تغييرها عشان ترضي طرف معين، عدم اتخاذ موقف عدائي، محاورة كل الاطراف، جمع اكبر قدر من المعلومات، تعليم و تثقيف الأخرين. 

• بعدها درنا تدريب بسيط، فريقي ناقش نقطة على دور المجتمع الدولي في المساواة و عمليات بناء السلام، رأينا كان عبارة عن مجموعة نقاط : 
– مافيش اي شفافية في آلية الاختيار، الأقرب أنها مجهولة، يعني نحنا مش عارفين حتى الأساسيات الي بنوا عليهن المسودة متاع الحوار، يعني ليش هذي هكي؟ و ليش هذا حياخذ هكي، 
– المجتمع الدولي مش عارف كيف يوصل للشارع الليبي، كل حاجة عبارة عن طرفين يقسموا في المكاسب السياسية و كلهم ناسيين أن نحنا اللي حنعيشوا في عواقب الحوارات هذي. 
– عدم التنوع في التمثيل، للدقة يمشوا لنفس الاشخاص في كل ورشة عمل او حوار، اشخاص مستحيل بروحهم يمثلوا تنوع النسيج الليبي. 
– المجتمع الدولي غير محايد و مقسم اصلا في داخله. 
– عدم وجود أي حلول منطقية أو إنسانية. 
– بالنسبة لتمثيل المرأة، يجيبوا في وحدة يحطوها في الصور عشان تبان أن اهو راه في مرأة هنا وخلاص، بالاحرى مش ملتزمين بالمبادئ الي يدعولهن. 
 • اكيدة للمشاكل هذي الحل مش من برا، في جانب حضور المرأة بالاخص، لازم من نشر ثقافة وجود المرأة شيء اساسي لنقل ليبيا لبر الأمان. 
و اكيدة لوجود دولة ديمقراطية حقيقية، لازم من اعتراف كامل بحقوق نصف المجتمع الاخر. 

• الجزء الثاني من الورشة كان مخصص لقانون 1325 : عبارة عن وثيقة من 18 مادة تركز على أهمية مشاركة النساء في صنع القرار و عمليات السلام. متوفر على الأنترنت تقدروا تطلعوا عليه. 
 
• الجزء الاخير كان يتحدث على مبدأ المناصرة، شن هي المناصرة؟ 
عبارة عن حشد الرأي العام من أجل قضية، سواءً سياسية، إقتصادية أو إجتماعية. 
شن الفكرة من المناصرة؟ تغيير الوضع الراهن من خلال إقناع المجتمع بقضية معينة. 
• التدريب كان عبارة عن إنك تختار قضية معينة، وفي خلال دقيقتين تحاول تقنع المستمعين بقضيتك، بأبسط و أسرع صورة ممكنة، مع ذكر الحجج اللي ممكن تواجهك.  فريقنا اختار قضية المواطنة، و حق المرأة في انها تعطي الجنسية، في اقل من دقيقتين حاولنا نحكوا على الموضوع بالطريقة هذي و قولولي اذا اقناعناكم : 
هل تعتقد أن المرأة إنسان ؟ 
هل تعتقد بأنه حاجة منطقية أن تسلب حق شخص بسبب جنسه أو عرقه أو دينه؟ 
هل تعتقد أن المرأة مواطن نفسها نفس الرجل؟ 
إذا جاوبت على الأسئلة الي فاتت بنعم، معناها انت تعتقد أن المرأة مواطنة ليبية نفسها نفس الرجل، إذن مافيش حاجة تمنعها أنها تمنح جنسيتها لأطفالها. في من يقول حاجة هكي تأثر على “الهوية الليبية”، الهوية الليبية متنوعة و غنية بعدة اعراق و تقاليد و افكار و لغات ومن قال الإختلاف مش كويس؟ نشوف فيها حاجة ممكن تطور المجتمع و تساعد على النهوض بالدولة الليبية. و مع موت شريحة كبيرة من الشباب من 2011 لعند الان، نسبة حاملين الجنسية الليبية حتنخفض بكل، يعني من حيبني البلاد و يطورها؟ واحد مش ليبي؟ يقولك شن دخلني بيكم انا شن حنحصل منها ؟
الجرس رن في نص الكلام لكن إن شاءالله تكون رؤيتنا للقضية وصلت. 

كتابة : J.E 
Advertisements

One comment

  1. روعة الصراحة
    وعلى موضوع منح الجنسية إلي يقولوا يأثر على “الهوية
    الليبية” ،يعني كيف ؟!!
    هي ليبية وربت صغارها وهذا كان إختيارها ولازم الكل يحترموه والأم الليبية إلي ربت كل صغار ليبية وكلهم ليبين توا بس لأن صغارها من أب مش ليبي بتربيهم ميستاهلوش الجنسية الليبية ؟!

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s